Наградата „Крсте Петков Мисирков“ се доделува за животно дело и е наменета за новинари чии остварувања оставиле траен печат во македонското новинарство. Кандидатите може да се пријават самостојно или да бидат предложени од тројца новинари. Со пријавата се доставуваат личните податоци, кратка биографија и образложение за досегашниот придонес на кандидатот.
За годишната награда „Јашар Еребара“ за истражувачко новинарство може да конкурираат новинари со сериозни истражувачки стории објавени во македонските медиуми во текот на 2024 година. Приказните треба да откриваат злоупотреби на власта, кршење на човековите права и други прашања од јавен интерес. Апликациите може да се поднесат самостојно или со предлог од тројца новинари.
Новина оваа година е наградата за најдобро новинарско известување за теми од локално и регионално значење. За оваа категорија може да аплицираат новинари кои работат во локални и регионални медиуми или се дописници на национални медиуми надвор од Скопје.
Четвртата категорија е наградата за најдобар снимателски проект од јавен интерес. За неа можат да конкурираат сниматели, членови на ЗНМ и Секцијата на сниматели, со проекти од информативна содржина што се објавени во домашен медиум.
Услови за пријавување и рокови
Секој кандидат може да поднесе најмногу два медиумски продукти, при што е потребно да достави функционален линк од објавата или материјалот да биде испечатен или снимен на USB ако се поднесува во канцелариите на ЗНМ.
Пријавите се доставуваат најдоцна до 21 февруари 2025 година на електронската адреса contact@znm.org.mk со назнака „За ЗНМ НАГРАДА 2024“ или по препорачана пошта на адресата: Здружение на новинарите на Македонија, Градски Ѕид, блок 13, 1000 Скопје.
Добитниците на наградите за истражувачко новинарство, за новинарско известување на теми од локално и регионално значење и за најдобар снимателски проект ќе добијат плакета и парична награда од 1.000 евра во денарска противвредност.
Изборот на наградените ќе го изврши Комисија за доделување на наградите при ЗНМ.
