Во текот на зимата постои поголем ризик за инфекции на уринарниот тракт. Тие се појавуваат кога бактериите, го инфицираат уринарниот систем и се шират на мочниот меур. Инфекцијата обично е придружена со непријатни симптоми како што се често мокрење, болка или печење за време на мокрењето, заматена урина или со непријатен мирис и болка во долниот дел на стомакот или грбот.
Додека причините за оваа инфекција може да бидат различни за секој човек, зимата носи одредени специфични фактори кои го зголемуваат ризикот од оваа инфекција, вели урологот д-р П.Вамши Кришна. Некои од најчестите причини вклучуваат:
Намален внес на течности во текот на зимата, што доведува до помалку мокрења а токму тоа им овозможува на бактериите повеќе време да се развијат во уринарниот систем.
Ослабен имунитет, што го прави телото помалку ефикасно во борбата против инфекции.
Облеката која е премногу тесна и премногу топла создава влажна средина во пределот на гениталиите, погодна за раст на бактерии.
„Иако ова се вообичаени причини за инфекции на уринарниот тракт, постои една причина што луѓето често ја занемаруваат што го прави човекот поподложен на инфекции, особено во зима, а тоа е недостатокот на витамин Д“, вели докторката.
Врската помеѓу витаминот Д и инфекциите
Д-р Кришна забележува дека ниските нивоа на витамин Д во текот на зимата често се случуваат поради намалената изложеност на сончева светлина. Витаминот Д е клучен за одржување на силен имунолошки систем и за производство на антимикробни пептиди кои го штитат уринарниот тракт.
„Затоа е од исклучителна важност внесувањето доволно витамин Д. Луѓето можат да обезбедат оптимални нивоа на овој витамин преку сончева светлина, додатоци или храна како што се масна риба, збогатени млечни производи и жолчки од јајце“, објаснува урологот.
Важно е да се напомене дека иако недостатокот на витамин Д не предизвикува директно ИУТ, студиите покажаа дека овој недостаток може да го ослаби имунолошкиот одговор, што ги прави луѓето поподложни и на акутни и на повторливи инфекции.
Вообичаени навики кои го зголемуваат ризикот
Ризикот од ИУТ е под влијание на различни фактори, покрај сезонските промени.
„Жените се изложени на поголем ризик бидејќи уретрата им е пократка, што им овозможува на бактериите полесно да стигнат до мочниот меур“, објаснува д-р Кумар, додавајќи дека сексуалната активност може да внесе бактерии во уринарниот систем, додека хормоналните промени за време на бременоста, менопаузата или менструалниот циклусот може да ја наруши вагиналната микрофлора, што ја зголемува можноста за инфекции.
Хроничните состојби како дијабетес, камења во бубрезите или синдром на хиперактивен мочен меур, исто така, го зголемуваат ризикот од ИУТ. Исто така, лошите хигиенски навики, како што е бришењето од назад кон напред, според лекарите се меѓу најчестите причини за инфекција.
„Покрај тоа, одредени однесувања специфични за зимата може да ја зголемат фреквенцијата. На пример, луѓето често прескокнуваат туширање поради студот, дозволувајќи им на бактериите да се насоберат во пределот на гениталиите. Носењето влажна или валкана облека, како што се испотени тренерки или топлинска долна облека, подолг временски период создава идеална средина за развој на бактерии. Исто така, намалувањето на физичката активност во текот на зимата може да ја ослаби одбраната на организмот, бидејќи седечкиот начин на живот го успорува метаболизмот и севкупниот отпор на организмот“, потсетува докторката.
Како да спречите инфекции на уринарниот тракт во текот на зимата
Еве неколку ефективни совети за намалување на ризикот од ИУТ во текот на зимата:
-Пијте многу вода за да ги исфрлите бактериите од уринарниот тракт.
-Бришете се од напред кон назад и избегнувајте јаки сапуни.
-Не држете ја урината за да спречите акумулација на бактерии.
-Носете топла облека и избегнувајте студенило во карличната област.
-Изберете памучна долна облека и избегнувајте тесна облека.
-Уринирајте после секс, бидејќи тоа помага да се исфрлат бактериите.
-Јадете храна богата со витамин Ц и пробиотици.
-Ограничете го внесот на шеќер, бидејќи им помага на бактериите да растат.
-Бидете активни, бидејќи редовното вежбање го зајакнува имунолошкиот систем.
