Во своето последно издание, Paris Match објави седум фотографии од Пелико со маж за кој тие го опишуваат како нејзин партнер, направени додека шетаат по улиците на нејзината нова резиденција, пишува Гардијан.
Пелико доби меѓународно признание минатата година откако се откажа од своето законско право на анонимност за време на судењето на нејзиниот поранешен сопруг и другите обвинети.
„Не треба да се срамиме, тие треба да се срамат“, рече тогаш таа за сторителите.
Доминик Пелико, нејзиниот поранешен сопруг, ја дрогирал речиси десет години за тој и десетици непознати мажи кои ги нашол на Интернет да ја злоупотребуваат.
Доминик Пелико се изјасни за виновен и зачувал стотици видеа од злоставувањата на својот компјутер во папка наречена Злоставување. Францускиот суд во декември го осуди на 20 години затвор.
„Секогаш кога ќе биде нарушена приватноста на нашиот клиент, ние ќе реагираме и ќе бараме судска одлука“, изјави вчера адвокатот Антоан Ками.
Тој додаде дека е шокантно и разочарувачки што Paris Match тајно ја фотографирал Пелико, личност чија траума е веќе документирана со 3.000 фотографии и видеа. Тој го обвини магазинот дека не научил ништо од четиримесечното судење.
На прашањето на АФП, од Paris Match не сакаа да го коментираат случајот. Жизел Пелико се најде на листата на Тајм за највлијателни луѓе во светот за 2025 година.
