Истражувачи од Кинескиот универзитет во Хонг Конг развија технологија која може да извлече вода од почвата на Месечината и да ја претвори во кислород и хемиско гориво. Почвата на Месечината можеби е способна да одржува живот, според нова студија.
Истражувачите развиле технологија која извлекува вода од месечевата почва и ја користи за претворање на јаглерод диоксид во кислород и хемиско гориво. Технологијата тоа го постигнува претворајќи светлина од Сонцето во топлина.
Според студијата објавена во списанието Joule на Cell Press, ова истражување би можело „потенцијално да отвори нови врати за идни мисии во длабокиот вселенски простор“, бидејќи може да ги намали огромните трошоци за носење суштински ресурси како вода на Месечината.
Еден галон (3.78 литри) вода чини околу 83.000 долари (71.230 евра) за да се испрати со ракета, продолжува студијата, при што еден астронаут троши околу четири галони (15.14 литри) на ден.
„Никогаш не замислувавме целосно каква ‘магија’ поседува месечевата почва“, рече водечкиот истражувач Лу Ванг.
Сепак, студијата забележува дека постоечките стратегии за извлекување вода од површината на Месечината вклучуваат повеќе „енергетски интензивни“ чекори и не објаснуваат колку CO₂ се користи за добивање на гориво.
Екстремната средина на Месечината и понатаму ќе биде предизвик за добивање повеќе кислород и вода од површината, продолжува студијата, поради „драстичните температурни флуктуации“, радијацијата и ниската гравитација.
Јаглерод диоксидот што се издишува од астронаутите нема да биде доволен за да ги снабди сите потреби за вода, гориво и кислород за тимот.
