Премиерот на Гренланд, Муте Егеде, предложи денеска општи избори на островот да се одржат на 11 март и рече дека ќе побара од парламентот да го одобри тој предлог.
Се очекува дека предизборните кампањи ќе бидат фокусирани на тежнеењето на жителите на островот кон независност, пренесува Ројтерс.
„Ова е сериозно време. Време кое никогаш не сме го доживеале во нашата земја. Ова не е време за внатрешни поделби“, наведува Егеде во објава на социјалните мрежи.
Изборите на Гренланд треба да се одржат пред 6 април, наведува агенцијата.
Американскиот претседател Доналд Трамп во декември изрази желба да ја анектира данската територија Гренланд и не ја исклучи употребата на воена или економска сила.
Гренланд беше данска колонија до 1953. година и од тогаш доби широка автономија, вклучувајќи право да прогласи независност, иако Копенхаген останува одговорен за безбедноста и надворешната политика на Гренланд.
Полуавтономната територија на Данска соопшти дека е отворена за бизнис, но не сака да биде дел од Соединетите Американски Држави.
