Стотици жители на Гренланд излегоа на улиците протестирајќи против изјавата на американскиот претседател Доналд Трамп за преземање на контрола над нивниот остров.
Снимките покажуваат демонстранти собрани во главниот град Нуку, кои мафтаат со гренландските знамиња и држат транспаренти со пораки како: „Почитувајте го суверенитетот на Гренланд“, „Ние не сме за продажба“ . Собирите се одржале и во други места на островот.
„Сакаме да бидеме тоа што сме“ Јенс-Фредерик Нилсен, лидер на десноцентристичката партија Демократиит, која победи на овогодишните парламентарни избори и најверојатно ќе биде идниот премиер, се приклучи на премиерот Муте Б. Егеде, кој заминува, и заедно ја предводеа поворката на демонстрантите кон американскиот конзулат во предградието на Нуку.
„Сакаме да бидеме тоа што сме. Нашата автономија и слобода никогаш нема да бидат предмет на расправа. Нема никаква шанса да разговарам со Трамп за тоа Гренланд да стане дел од САД. Гренланд ќе биде Гренланд“, изјави Нилсен.
Говорејќи за гренландските весници „Sermitsiaq“, Егеде го нарече пристапот на американскиот претседател „целосно неприфатлив“.
На островот живеат 57.000 жители Во последните неколку месеци, Трамп неколкупати изразил интерес за преземање на контрола над Гренланд. Повторно ја спомена оваа идеја во четвртокот за време на состанокот со генералниот секретар на НАТО, Марк Руте, во Белата куќа.
На прашањето на новинарите за можното анектирање, Трамп изјави: „Мислам дека тоа ќе се случи“. Понатаму додаде дека овој териториум е клучен за националната безбедност на САД, нагласувајќи дека САД веќе имаат воени бази таму.
Стратегиски важниот арктички остров е дом на само 57.000 жители и е самоуправен териториум на Данска. Претставниците на Гренланд остро се спротивставија на плановите на Трамп да го направи островот дел од САД. Во петокот, лидерите на пет партии во гренландскиот парламент објавија заедничка изјава во која ги отфрлаат плановите на Трамп.
