Жителите на Амстердам презедоа пионерски чекор за да го искажат своето незадоволство од проблемот со прекумерниот туризам во градот. Локалното население покрена тужба против општината, обвинувајќи ја дека не презема доволно мерки за ограничување на неодржливиот број посетители.
Холандскиот град со години се соочува со тешки последици од масовниот туризам, а градските власти повеќепати ветија дека ќе го намалат притисокот. И покрај мерките за намалување на бројот на туристи, бројот на ноќевања се зголемил за 3% во 2024 година.
Исто така, беа лансирани и кампањи за промена на имиџот на Амстердам – од популарна дестинација за „стаг партии“, алкохолни тури, дроги и секс-туризам, кон поодржлив и културен туризам.
Но жителите велат: „За нас, ништо не се промени.“
Група жители на Амстердам поднесе тужба против градската општина. Граѓанската иницијатива „Амстердам има избор“ собра 50.000 евра од локалното население и е поддржана од уште 12 здруженија на жители.
Тужбата има за цел да го осуди неефикасното управување со туризмот од страна на општината.
Законски ограничувања што не се почитуваат
Во 2021 година, општината донесе законска одлука со која се ограничува бројот на туристички ноќевања на 20 милиони годишно. Сепак, само во изминатата година се евидентирани 22,9 милиони ноќевања, а за 2025 се очекува бројката да биде уште поголема.
Жителите тврдат дека властите не ја почитуваат сопствената регулатива и не прават доволно за да го спречат прекумерниот туризам.
„Бројот на ноќевања веќе три години го надминува договорениот лимит од 20 милиони, без општината да преземе ефективни мерки,“ изјави Јаспер ван Дајк, еден од иницијаторите на тужбата.
Општината воведе мерки – но не се доволни
Иако општината навистина презеде одредени чекори, жителите тврдат дека резултатите се недоволни Туристичката такса е зголемена, бројот на речни и морски крстарења што пристигнуваат во градот е намален на половина и воведена е забрана за изградба на нови хотели
Но, туризмот и понатаму расте – иако со поспоро темпо.
Во 2024 година, бројот на ноќевања се зголемил за 3% во споредба со претходната година.
За 2025 година се прогнозираат меѓу 23 и 26 милиони ноќевања.
Предлог: уште повисока туристичка такса
Амстердам веќе има највисока туристичка такса во Европа – 12,5%.
Но жителите кои стојат зад тужбата сметаат дека ова не е доволно и повикуваат на уште поголемо зголемување на таксата.
„Градот може да ги искористи дополнителните приходи од туристичката такса за: купување недвижности за решавање на кризата со домување и справување со ѓубрето на улиците, што е делумно предизвикано од масовниот туризам,“
вели Ван Дајк.
„Ако општината ја зголеми туристичката такса значително, ќе собере повеќе приходи од сите планови на претходните градски коалиции заедно.“
