Секој кој редовно вежба ги ужива бенефитите по здравјето, но жените имаат повеќе корист од мажите, особено кога станува збор за кардиоваскуларното здравје, се вели во студијата објавена во списанието на Американскиот колеџ за кардиологија. Студијата исто така откри дека со пократко времетраење на вежбање, жените постигнувале слични или поголеми здравствени придобивки од мажите, пишува порталот „Медикал Њуз Тудеј“.
Научниците од Националниот институт за здравје на САД ја следеле здравствената состојба на голема група од 400.000 мажи и жени во САД дваесет години.
Тие заклучија дека жените кои редовно вежбале имале 24 отсто помали шанси да умрат предвреме од која било причина во периодот на студијата. Во исто време, тие имале 36 отсто помал ризик од смртоносен срцев удар, мозочен удар и други кардиоваскуларни проблеми, во споредба со жените кои не вежбале редовно.
Според резултатите од истото истражување, мажите кои редовно вежбале имале 15 отсто помала веројатност за прерана смрт и 14 отсто помал ризик од фатален кардиоваскуларен исход во споредба со мажите кои претпочитале седентарен начин на живот. Така, студијата покажала дека жените имаат поголема здравствена корист од мажите од редовното вежбање, кога е намален ризикот од смрт и кардиоваскуларни заболувања.
Колку треба да вежбате?
Научниците открија дека околу 300 минути умерена физичка активност или 110 минути енергична физичка активност неделно се доволни за мажите. Кај жените кои практикувале 140 минути умерени аеробни вежби неделно, забележан е 18 отсто помал ризик од прерана смрт, додека само 57 минути енергични аеробни вежби неделно резултирале со 19 отсто помал ризик од смрт. Тоа значи дека жените имаат поголема корист од пократките периоди на вежбање.
Мажите, за да го постигнат истиот бенефит од вежбањето како жените, морале да вежбаат двојно повеќе од жените. Така, кај нив е забележан 18 отсто помал ризик од смрт по 300 минути умерено аеробно вежбање неделно и 19 отсто помал ризик по 110 минути интензивно вежбање неделно.
Тренингот за сила е исто така важен
Придобивките од редовното вежбање не се ограничени само на кардио. Тренингот за сила исто така се покажа како важен, а во овој случај беше забележан поголем бенефит кај жените во споредба со мажите. На пример, кај жените кои редовно практикувале тренинзи за сила, забележан е 19 отсто помал ризик од смрт, додека кај мажите овој процент бил 11 отсто во споредба со нивните неактивни врсници.
За 30 проценти помал ризик од кардиоваскуларни проблеми е забележан кај жените, а кај мажите, кај тренинзите за сила, тој изнесува 11 проценти. Научниците велат дека причина за тоа веројатно е фактот што машките тела се анатомски и физиолошки различни од женските.
Разликите се видливи во невромускулната функција, капиларната густина, циркулацијата, метаболизмот на мастите и моментот кога се појавува глад.
„Важен заклучок од оваа студија е дека редовното вежбање, без разлика на полот, има значително влијание врз намалувањето на развојот на кардиоваскуларни проблеми“, заклучи д-р Елинор Левин, кардиолог и професор на Стенфорд.
Извор: index.hr
