Жанг Јажоу од Кина, ја тужеше светски познатата компанија Tesla поради сообраќајна несреќа во која нејзините родители беа тешко повредени. Но, наместо да добие компензација, судот пресуди во корист на Tesla, а таа сега мора да ѝ плати оштета на компанијата.
Инцидентот се случил во 2021 година во провинцијата Хенан, Кина. Родителите на Жанг добиле потрес на мозокот и поминале неколку дена во болница, додека таа и нејзиното бебе останале неповредени.
Според полицискиот извештај, виновник за несреќата бил нејзиниот татко, бидејќи не држел безбедно растојание во сообраќајот. Жанг, сепак, тврдела дека кочниците на автомобилот откажале и барала одговори од компанијата.
Таа поднела жалба до локалниот пазарен регулатор, барајќи поврат на средствата и компензација. Но, бидејќи Tesla е позната по тоа што автомобилите ѝ се целосно компјутеризирани, Жанг побарала детални податоци од возилото пред сударот, надевајќи се дека ќе добие доказ за дефект на кочниците. Компанијата одбила да ги сподели податоците.
Откако случајот стана јавен и доби внимание во кинеските медиуми, Tesla возврати со тужба против Жанг, обвинувајќи ја за ширење лажни информации и барајќи оштета од 684.000 долари.
Под притисок на јавноста и регулаторите, Tesla на крајот ги објави податоците од автомобилот, но истовремено го објави и нејзиниот идентификациски број на возилото. Според компанијата, во моментот на сударот, нејзиниот татко возел 120 km/h, а кочниците функционирале правилно за да ја ублажат силината на ударот.
Жанг ги изгуби двете тужби што ги поднесе против Tesla. Судот пресуди дека не може да докаже дека кочниците навистина откажале.
На крајот, судот нареди Жанг јавно да ѝ се извини на Tesla и да плати 23.000 долари за покривање на судските трошоци и штетата што ѝ ја нанела на репутацијата на компанијата.
Овој случај ја покажува сложеноста на судирот меѓу индивидуалните тужби и големите технолошки корпорации, особено кога станува збор за напредни, компјутеризирани возила.
