Земјотрес со јачина од 3.1 степени според Рихтеровата скала е регистриран ноќеска во источниот дел на земјата, а бил почувствуван во Пехчево, Берово и околните населени места.
Според информациите од Сеизмолошката опсерваторија при Природно-математичкиот факултет во Скопје, земјотресот бил регистриран во 00:22 часот.
Епицентарот потекнува од епицентралното подрачје Делчево – Берово, на околу 120 километри југоисточно од Скопје.
Јачината на потресот изнесува 3.1 степени според Рихтеровата скала.
Според досегашните податоци, земјотресот бил почувствуван од жителите на Пехчево, Берово и околината со интензитет од III до IV степени според Европската макросеизмичка скала.
Засега нема информации за причинета материјална штета.
