Според официјалните податоци, кон украинските градови биле лансирани повеќе од 470 ударни дронови и 48 ракети од различен тип, меѓу кои и балистички и крстосувачки проектили.
Најтешка е состојбата во Тернопил, каде што руските проектили погодиле деветкатни станбени згради, предизвикувајќи големи пожари. Зеленски потврди дека уништени се цели делови од објектите и дека под урнатините можно е да има луѓе. Досега е познато дека десетици лица се повредени, а деветмина трагично загинале. Службите за спасување продолжуваат со извлекување и потрага.
Сериозни последици претрпел и Харков, кој бил под масовен напад уште од вечерните часови. Таму се ранети десетици граѓани, меѓу кои и деца, а оштетени се енергетски постројки, транспортни системи и повеќе цивилни објекти. Нападите продолжиле и во Ивано-Франковската област, каде што е погодена енергетската инфраструктура, при што се повредени три лица, од кои двајца се деца. Во Лавовската област повторно биле цел критични и енергетски објекти, а повреден е и еден граѓанин во Донецката област. Ракетни и дрон напади биле регистрирани и во регионите Киев, Миколаев, Черкаси, Чернигов и Днипро.
Зеленски порача дека секој ваков напад е јасен доказ дека меѓународниот притисок врз Русија сè уште не е доволен. Тој апелираше дека Украина има итна потреба од дополнителни ракети и системи за противвоздушна одбрана, од зголемени капацитети за борбената авијација и од засилено производство на дронови кои ќе го заштитат цивилното население. Според него, Русија мора да одговара за стореното, а Украина мора постојано да работи на зајакнување на сопствената одбрана за да може навремено да ги пресретнува ракетите, да ги неутрализира дроновите и да ги спречува идните напади.
Во пораката тој изрази благодарност до меѓународните партнери што продолжуваат да ја поддржуваат Украина во, како што рече, борбата за живот и опстанок.
