Во своето редовно вечерно обраќање, Зеленски нагласи дека дипломатскиот процес продолжува со интензивно темпо.
„Украинската делегација веќе треба да биде во САД до вечерва, според американското време. Дијалогот заснован врз Женевските точки ќе продолжи. Дипломатијата останува активна. Американската страна покажува конструктивен пристап и во наредните денови можно е да се конкретизираат чекорите за утврдување како да се доведе војната до достоинствен крај. Делегацијата ги има сите неопходни директиви и очекувам да работи согласно јасните украински приоритети“, истакна Зеленски.
Паралелно, тој најави дека се прават подготовки за соработка со западните партнери во текот на следната недела, особено во поглед на зајакнување на украинската противвоздушна одбрана. „Сметаме на поддршката од нашите партнери“, додаде претседателот.
Украинската делегација, предводена од Рустем Умеров – секретар на Советот за национална безбедност и одбрана, денес отпатува во САД за продолжување на разговорите околу американскиот мировен план. Зеленски очекува првичен извештај во недела.
Според медиумите, меѓу членовите на делегацијата се и Кирило Буданов, шеф на украинската Одбранбена разузнавачка служба; Вадим Поклад, заменик-директор на Службата за безбедност на Украина; како и Андриј Хнатов, началник на Генералштабот. Аксјос претходно објави дека и Андриј Јермак, поранешниот шеф на кабинетот на Зеленски, треба да се приклучи на разговорите во САД.
Преговорите се однесуваат на можноста за постигнување т.н. „мировен договор“ за ставање крај на војната што Русија ја започна против Украина.
Извор: B92.net
