Украинскиот претседател Володимир Зеленски, во пресрет на неговата средба со американскиот претседател Доналд Трамп, доби гаранции за поддршка од лидерите на западните земји.
Зеленски во саботата одржа видеоповик со лидерите на речиси десет европски држави и Канада, како и со високи претставници на Европската комисија и НАТО.
Во разговорите со Зеленски учествуваа и челниците на Европската унија, Урсула фон дер Лајен и Антонио Кошта, кои во саботата ветија дека поддршката на ЕУ за Украина нема да ослабне.
„Ги поздравуваме сите напори насочени кон нашата заедничка цел – праведен и траен мир кој ќе го зачува украинскиот суверенитет и територијалниот интегритет“, порача претседателката на Европската комисија, Урсула фон дер Лајен, на платформата X.
Таа додаде дека тоа ја зајакнува безбедноста и одбранбените капацитети на Украина, како составен дел од безбедноста на целиот европски континент.
„Во 2026 година, Европската комисија ќе продолжи да врши притисок врз Кремљ, да ја задржи поддршката за Украина и интензивно да работи на придружување на Украина на нејзиниот пат кон членство во ЕУ“, истакна фон дер Лајен.
Антонио Кошта, претседател на Европскиот совет кој ги претставува 27-те земји членки на Унијата, исто така вети континуирана поддршка за Украина, наведувајќи на X: „Поддршката на ЕУ за Украина нема да ослабне. Во војна, во мир и во обнова“.
Кошта предупреди дека Европската унија е подготвена да воведе дополнителни санкции кон Русија доколку биде потребно. Тој ги наведе чекорите на ЕУ кои „ја направија Украина посилна“, вклучувајќи го и „продолжувањето на санкциите против Русија, со дополнителни мерки доколку тоа се покаже неопходно“.
„Силна и просперитетна Украина во рамките на ЕУ е клучна безбедносна гаранција. Продолжуваме да работиме на цврст и траен мир за Украина, во тесна соработка со нашите американски партнери“, додаде Кошта.
Портпарол на германската влада изјави дека европските лидери во разговорите му дале на Зеленски „целосна поддршка и ја нагласиле својата посветеност да продолжат со тесна соработка со САД за постигнување одржлив и праведен мир во Украина“.
Германскиот канцелар Фридрих Мерц го свикал видеоповикот на барање на Зеленски, потврди портпаролот.
Францускиот претседател Емануел Макрон изјави дека Европејците мора целосно да бидат вклучени во дискусиите кои директно ги засегаат, соопштија претставници од Елисејската палата. Макрон во јануари треба да биде домаќин на уште една средба на таканаречената „Коалиција на подготвените“ – група земји кои ветија силна поддршка за Киев – во Париз.
Европа внимателно следи како Зеленски, кој во саботата се сретна со канадскиот премиер Марк Карни во Халифакс, оди на преговори со Трамп во Палм Бич, Флорида, во недела. Белата куќа соопшти дека билатералната средба ќе се одржи во 15 часот по локално време.
„Црвени линии“ на Украина
Зеленски изјави дека за време на преговорите јасно ќе стави до знаење дека Киев нема да прифати капитулација или мир диктиран од Москва.
„Секако дека постојат црвени линии за Украина и за украинскиот народ“, рече тој во соопштение објавено на социјалните мрежи пред средбата.
Тој повторно ги отфрли барањата на Русија – кои ги спомена и Трамп – Украина да отстапи територии кои моментално не се под руска контрола, но додаде дека Киев изнел „компромисни предлози“ за нерешените територијални прашања.
Зеленски изјави дека со Трамп планира да разговара за рамка од 20 точки за можен мировен план, кој го претстави претходно оваа недела, додавајќи дека безбедносните гаранции ќе бидат клучен дел од секое примирје, со цел да се заштити Украина од нови руски напади.
Тој истакна дека секојдневните руски напади покажуваат дека Москва нема интерес за мир и најави дека ќе го притисне Трамп за испорака на дополнителни противвоздушни системи, наведувајќи дека Украина има потреба од повеќе ракети за да се спротивстави на нападите со дронови и ракети.
Зеленски додаде дека во тек се дополнителни разговори со европските партнери за безбедносни гаранции и ја поздрави одлуката на Европската унија да овозможи дополнителна финансиска поддршка преку заеми од повеќе милијарди евра. Сепак, според него, сè уште постојат финансиски празнини, особено во делот на производството на оружје и беспилотни летала.
Русија не учествува во разговорите во Палм Бич, а Зеленски нагласи дека мир не е можен без договор со Москва.
Тој додаде дека со Трамп има намера да разговара и за понатамошни инвестиции во повоената обнова на Украина, истакнувајќи дека обновата на земјата ќе бара создавање посебни фондови и финансирање во вредност до 800 милијарди долари.
