Здружението на преведувачи и толкувачи на Македонија (ЗПРМ) денеска ќе одбележи 15 години постоење и работа во унапредувањето на преведувачката и толкувачката професија во земјава.
Во рамките на свеченоста ќе бидат презентирани почетоците на Здружението, најзначајните постигнувања во изминатата деценија и пол и ќе бидат доделени признанија и благодарници за придонесот на неговите основачи и минати претседатели.
„Со овој значаен јубилеј и 15 години постоење и посветена работа, Здружението ја потврдува својата важна улога во развојот на и застапувањето за преведувачката и толкувачката професија во Северна Македонија“, соопшти ЗПРМ.
ЗПРМ е професионално здружение основано во декември 2010 година. Неговата мисија е да воведе професионални стандарди на пазарот во државава, да работи на професионалниот развој на членовите на професијата и да создава позитивна перцепција за професиите преведувач и толкувач меѓу членовите на професијата, потенцијалните клиенти и пошироката јавност.
