На 10 и 11 октомври, Младинскиот културен центар (МКЦ) повторно е домаќин на еден од најзначајните фестивали за млада и алтернативна сцена – „Здраво млади“, кој годинава го одбележува своето 15. издание.
Првата вечер, под наслов Imagine Macedonia, се одржува во соработка со Музичка младина на Македонија (JM Macedonia). Во салата „25 мај“, осум млади бендови од земјава ќе се борат за настап на главната вечер на фестивалот, а победникот ќе има шанса да настапи и на европскиот фестивал Imagine во Брисел.
На сцената ќе настапат: LSD During War, Големата вода, Мираж, The Pot, Sunneater, Корка, Tsar Von Time и D.E.N.M.V.
Втората фестивалска вечер (11 октомври) се шири на три сцени и се организира заедно со „Tiiiit! Inc.“. Главната бина ќе биде резервирана за вистински музички бисери: Ахмед Факрун – пионерот на арапскиот синт-поп и космополитски диско, Repetitor – легендарното белградско рок трио се враќа по пауза од 20 месеци и Ki Klop, Lelee, Gillespie, Suze od luka, Pocket palma – свежа регионална енергија
Сцената ќе ја раздвижат и домашни имиња: Преку ред, Pedro Horisonte, КЕМ, како и диџеите Amplidyne Effect и Fitz кај бифето.
Влезот е слободен и за втората вечер.
„Здраво млади“ е повеќе од фестивал – тоа е платформа за нови гласови, за заедница и музичка слобода. Биди дел од приказната.
