Појадокот може значително да влијае на енергијата, концентрацијата и апетитот во текот на денот. Според нутриционистите, идеалниот утрински оброк треба да содржи комбинација од протеини, влакна и здрави масти, наместо рафинирани јаглехидрати и таканаречени „празни калории“. Таквата комбинација помага да се стабилизира нивото на шеќер во крвта и да се намали потребата од грицки подоцна во денот.
Нутриционистот Роб Хобсон, на пример, денот го започнува со грчки јогурт комбиниран со јаткасти плодови, семки и бобинки. Оваа комбинација обезбедува протеини, влакна и важни минерали како магнезиум, кои придонесуваат за подобро варење и долготрајна енергија.
Експертите советуваат да се избегнуваат намирници кои имаат многу шеќер или преработени состојки, како слатки пецива, засладени житарки или калорични кафе-пијалаци. Тие можат брзо да го зголемат нивото на шеќер во крвта, но исто толку брзо и да предизвикаат пад на енергијата и повторно чувство на глад.
Наместо тоа, нутриционистите препорачуваат појадок што може да вклучува јогурт, јајца, јаткасти плодови, семки, овошје или интегрални намирници. Таквиот оброк обично содржи околу 300 до 500 калории и обезбедува стабилен почеток на денот без нагли промени во енергијата.
