Во четврток на 30 мај во 20:00 часот во Паркот на франкофонијата, Зборци заедно со УКИМ организираат панел дискусија на тема-зборообразување.
„Неодамна, како Зборци, имавме можност да пласираме една важна тема во јавноста – процесот на зборообразување. Организиравме панел дискусија каде што се запознавме со тоа како новите зборови можат да внесат свежина и длабочина во нашите секојдневни разговори“ велат Зборци. Свесни за позитивната енергија и ентузијазам кои се создадоа околу оваа приказна, тие заедно со УКИМ го креираа настанот на „ЗБОРООБРАЗУВАЊЕ 2.0“.
Овој пат, ќе разговараат со: Владимир Мартиновски, актуелен декан на Филолошкиот Факултет ,,Блаже Конески” при УКИМ, Весна Мојсова-Чепишевска, автор и редовен професор Филолошкиот Факултет ,,Блаже Конески” при УКИМ и Татјана Б. Ефтимовска, професор, автор и еден од основоположниците на идејата ,,Зборци”.
„На овој настан ќе се обидеме да откриеме што всушност е возможно со зборовите. Ќе зборуваме за еволуцијата на јазикот и дали таа е привилегија на одредена група или е процес во кој сите ние можеме да учествуваме. Дали нашите најмлади ќе зборуваат македонски каков што ние го познаваме, или ние треба да го прилагодиме нашиот јазик на новите генерации? Како да го задржиме автентичниот дух на јазикот, додека истовремено го отвориме за нови идеи и влијанија? Дали новите зборови се резултат на нашата способност за адаптација во нови услови? Како глобализацијата и дигиталната ера создаваат нови јазични феномени кои го трансформираат македонскиот јазик? Ќе разговараме за тоа како зборовите може да бидат огледало на општествените промени, на нашите надежи и стравови, на нашите стремежи и успеси“, велат Зборци.
По завршувањето на дискусијата, свој DJ сет ќе има DISCONINJA.
