Оркестарот кој го придружуваше настанот настапуваше во живо, создавајќи посебна атмосфера и збогатувајќи ги настапите на пејачите и групите со своите изведби, надополнувајќи го звукот врз постоечката музичка матрица.
Во текот на вечерта беше доделена и наградата за најслушаната композиција помеѓу двете фестивалски изданија, која ја освои песната „Сафир“ во изведба на Таско и Малена, сподели продуцентот Александар Арсовски. Тој додаде дека е задоволен од годинешниот изглед и организација на фестивалот, истакнувајќи дека веднаш по затворањето на 39. издание, почнуваат подготовките за јубилејното 40. издание.
Арсовски откри дека организаторите планираат идната година да имаат три фестивалски вечери, од кои последната ќе биде посветена на изведби на најпознатите макфестовски евергрини, со што ќе се одбележи големиот јубилеј.
Финалната вечер на фестивалот беше дополнително збогатена со настапите на истакнати македонски уметници, како Дарио, Елена Ристеска, Дани Димитровска, Полина, Павле Камиловски, и многу други познати интерпретатори. На сцената со беспрекорна професионалност се истакнаа и водителите Маријана Станојковска и Димитар Атанасовски.
„Макфест“ годинава доби финансиска поддршка од Општина Штип и општествено одговорни компании во износ од пет милиони денари, додека Министерството за култура и туризам помогна со дополнителни еден милион денари.
