Младински културен центар – Битола во саботата (23.11.2024 година) во Europe House – Битола организираше завршен настан за проектот „Ехо на уметноста: мелодиите на Битола“.
Настанот претставуваше отворен ден за млади на којшо младите талентирани уметници од Битола имаа можност да настапат пред битолската публика со своите ликовни, графички и музички творби. Настанот започна со младинска дебата каде што дебатерите од дебатниот клуб при МОФ-центарот во Битола ги бранеа афирмативните и негативните аргументи на тезата „Овој Дом верува дека вештачката интелигенција ја намалува креативноста кај младите“.
Во уметничкиот дел беа претставени изработките на учесниците што беа креирани за време на работилниците во склоп на проектот, како и делата на млади битолски уметници ‒ аматери, со своите ликовни дела во различни техники. Од професионалните уметници се претставија: Ангела Каранфилова, Душан Шешиќ, Мартин Јакимовски и Михајло Тунев. Музичкиот дел од настанот го сочинуваа настапите на Еверест бенд, Tsar Von Time и бендот Спектра. Целта на самиот настан беше да се поддржи урбаната култура како средство за изразување и поттикнување на младински активизам и младински ангажман во Битола.
Проектот „Ехо на уметноста: Мелодиите на Битола“ на Младински културен центар ‒ Битола се спроведе во рамки на Регионалната програма за локална демократија во Западен Балкан 2 – ReLOaD2, финансирана од Европската унија (ЕУ), а ја имплементира Програмата за развој на Обединетите нации (УНДП).
Проектот „Ехо на уметноста: Мелодиите на Битола“ е кофинансиран од Општина Битола.
Главната цел на проектот е поттикнување и зајакнување на младинско учество и младинска ангажираност во локалната заедница преку алтернативни културни активности.
Ехо на уметноста: мелодиите на Битола всушност претставува младинска иницијатива што го нагласува младинското лидерство, при што младите имаа клучна улога во организирањето, промовирањето и одржувањето на активностите во самата иницијатива.
Потребата за културно изразување кај младите не е само потреба за индивидуално изразување и креативност, туку и за изградување на идентитет, социјална поврзаност, општествена ангажираност и споделување на вредности и искуства. Со цел да се поттикне активно младинско учество, проектот истражи различни аспекти од урбаната култура како што се уличната уметност, мултикултурниот дијалог, врсничка едукација и аргументирано говорење.
