Плажите на северниот дел од Сиднеј денеска беа затворени за посетители откако ајкула нападна и тешко повреди млад сурфер, што претставува трет напад од ајкула во овој австралиски град во последните два дена.
Според соопштението на полицијата на сојузната држава Нов Јужен Велс, службите за итна помош биле повикани на плажата Менли, откако ајкула го каснала сурферот додека бил во водата. Инцидентот се случил на северниот брег на Сиднеј.
Младиот човек претрпел сериозни повреди на ногата и веднаш бил пренесен во болница, каде што се наоѓа во критична состојба.
Локалните власти донесоа одлука за привремено затворање на неколку плажи од безбедносни причини, додека траат истрагите и засилените патроли во морето. Граѓаните и туристите се повикани да ги почитуваат предупредувањата и да избегнуваат капење и сурфање до понатамошно известување.
