За да добие одговори, ја започнува истрагата позната како Проект Sign. На тимот му е потребен астроном кој може да ги филтрира појавите поврзани со природни небесни феномени, како што се ѕвезди, планети или метеори.
Во тој момент, 37-годишниот директор на опсерваторијата McMillin при Универзитетот Охајо, Џ. Ален Хајнек, го добива повикот. Претходно работел за владата во текот на Втората светска војна, развивајќи технолошки решенија како радио-контролирани осигурувачи, што му обезбедило висок степен на безбедносна проверка.
Хајнек првично бил скептик и изјавил дека едвај слушнал за НЛО пред 1948 година и дека, како и повеќето научници, ги сметал за бесмислици. По една година, од вкупно 237 случаи во Проект Sign, тој заклучува дека 32% се поврзани со астрономски појави, 35% имале алтернативни објаснувања како балони, птици или ракети, додека 20% останале без рационално објаснување и биле означени како „неидентификувани“.
Во 1949 година, проектот бил заменет со Проект Grudge, кој од почеток го одбивал постоењето на феноменот. Хајнек не учествувал во тој проект, но подоцна изјавил дека пристапот бил пристрасен и насочен кон негирање на можноста за нешто необично.
Со зголеменото медиумско внимание, во 1952 година започнува Проект Blue Book, каде што Хајнек повторно е вклучен. Иако оваа работа била дополнителна должност покрај неговата академска кариера, тој редовно ги анализирал извештаите, а во одредени случаи одел и на терен. Тогаш почнал да забележува дека сведоците на НЛО настани обично се „нормални луѓе“, без мотив за лажење и често неволни да зборуваат за случувањата.
Во својата книга од 1977 година, The Hynek UFO Report, пишува дека многу сведоци се соочувале со јавен подбив, што резултирало со губење на вредни податоци. Социологот Жак Вале, негов соработник, сведочи за случаи каде што луѓето по вакви сведоштва се соочувале со навреди, семејни кризи и јавна стигма.
Во 1957 година, по лансирањето на Спутник од страна на СССР, Хајнек работел на проект за следење на сателити при Харвард. Станал јавно лице, се појавил на насловни страници, меѓу кои и списанието LIFE.
Во текот на 1960-тите, Хајнек сè повеќе се спротивставувал на начинот на кој воените власти ја воделе истрагата. Проект Blue Book го критикувал за недостаток на научна ригорозност, лоша комуникација и „трагични“ статистички методи. Иако останал дел од проектот, многупати се нашол меѓу две страни — научната заедница и јавноста што барала одговори.
Во 1966 година, откако во Мичиген биле пријавени бројни светлосни појави, Хајнек предложил теорија за оптичка илузија предизвикана од мочуришен гас. Изјавата станала предмет на потсмев, а двајца конгресмени повикале на истрага. На сослушување во Конгресот, Хајнек побарал да се формира цивилен панел на научници за детална анализа на феноменот.
Во 1968 година бил објавен Condon Report, кој заклучил дека не постои основа за понатамошно истражување на НЛО. Хајнек го нарекол „пристрасен“ и „слабо организиран“. Следната година, во 1969, Проект Blue Book бил официјално затворен.
По тоа, Хајнек се посветил на самостојна работа. Во 1972 година ја објавил книгата The UFO Experience, каде ја претставил својата класификација на НЛО средби:
- Блиска средба од прв вид – визуелно набљудување на објект одблизу
- Блиска средба од втор вид – физичко влијание, како оштетување на објекти, животни или електроника
- Блиска средба од трет вид – присуство на живи суштества или „патници“ во или околу објектот
Исто така, Хајнек дефинирал категории за далечни средби: ноќни светла, дневни дискови и радари/визуелни набљудувања.
Во 1977 година, насловот Close Encounters of the Third Kind бил искористен за филмот на Стивен Спилберг. Хајнек добил симболичен надомест за насловот и бил ангажиран како технички советник. Имал и кратка улога во филмот.
Во 1973 година ја основал организацијата Center for UFO Studies, која продолжила да собира и анализира извештаи и по неговата смрт во 1986 година од тумор на мозокот.
Синот на Хајнек, Џоел, изјавил дека најважното што го научил од татко му било значењето на отворениот ум. Според неговите зборови, „Нè чекаат уште многу тајни во универзумот, а некои можеби сè уште не сме подготвени да ги разбереме.“
Извор: History
