Денес започнува судењето за трагичниот пожар во дискотеката „Пулс“ во Кочани, при што загинаа 63 лица, а над 200 беа повредени. Обвинети се 34 лица и три фирми, вклучувајќи сопственици на дискотеката, поранешни министри, градоначалници и инспектори.
Пожарот настанал за време на настап на музичката група DNK, кога искрите од пиротехника го запалија таванот. Според обвинението, дискотеката не ги исполнувала минималните технички стандарди за угостителска дејност, ниту имала соодветни дозволи и заштитни планови.
Обвинението е комплексно – опфаќа 13 години, различни улоги на обвинетите и материјални прашања што го отежнуваат процесот. Судството и јавноста го гледаат овој случај како тест за способноста за независна и ефикасна правда.
На обвинителната клупа ќе седат сопствениците и управителите на фирмите Класик ДМ и MMMM Kafe, тројца градоначалници на Кочани, поранешни министри, државни секретари, локални инспектори и членови на обезбедувањето.
Покрај главниот процес, се водат уште два истражни предмети – против фирмата за обезбедување „Рубикон“ и против десетина полицајци кои овозможиле дискотеката да добие лиценца без исполнување на условите.
Судскиот процес ќе го води судијката Дијана Груевска-Илиевска од Основниот кривичен суд во Скопје, а обвинителството ќе биде застапувано од 15 јавни обвинители.
