Од утринава, од југозапад започнаа да се прошируваат пообилни врнежи во Македонија, кои во најголем дел се во форма на снег. Со тоа, во земјава започна формирање, зголемување и проширување на снежната покривка, што означува вистински зимски амбиент.
Причината за ваквото време е изразената циклонска активност над Медитеранот, која носи влажна воздушна маса, во комбинација со продор на студен воздух од север и североисток на Европскиот континент. Овој спој создава идеални услови за снежни врнежи и ниски температури.
Според мерењата до раните утрински часови, насекаде низ Македонија се регистрирани минусни температури, со појава на мраз и поледица. Температурите се движат под нулата во сите региони, што дополнително придонесува снегот да се задржува и да формира стабилна снежна покривка.
Во текот на денот, снег ќе паѓа во поголем дел од земјата, а најобилни врнежи се очекуваат во западните и југозападните предели, каде снежната покривка во градските средини ќе достигне од 5 до 10 сантиметри. На повисоките и планинските места, снежната покривка ќе биде значително поголема.
Во Скопје и околината се очекуваат послаби врнежи од снег, дожд и влажен снег, додека на околните ридско-планински подрачја ќе врне исклучиво снег. Ќе дува источен и југоисточен ветер, кој особено во Повардарието повремено ќе засилува.
Утринските температури ќе се движат од -7 до 1 степен, додека дневните ќе достигнат од -2 до 5 степени. Во Скопје, утрото ќе биде околу -4 степени, а дневната температура ќе се искачи до околу 2 степени.
Поради снегот, мразот и можната голомразица, се апелира до возачите на крајна внимателност, особено на планинските превои и повисоките патни правци.
