Министерството за образование и наука (МОН) соопшти дека денес започнува процесот на аплицирање за субвенциониран студентски оброк за академската година 2024-2025. Заинтересираните студенти можат да се пријават до 5-ти септември, а условите и начинот на аплицирање се објавени на следниот линк.
Пријавувањето се врши електронски преку порталот https://e-uslugi.mon.gov.mk/, и е достапно за сите редовни студенти на додипломски студии на државни и приватни високообразовни институции во Република Северна Македонија. Студентите мора да исполнуваат неколку услови: да не се во редовен работен однос, да не се регистрирани како индивидуални земјоделци, и да немаат месечен приход поголем од минималната нето-плата во тековната година.
При поднесувањето на апликацијата, студентите треба да прикачат пополнети и потпишани обрасци, вклучувајќи Пријава за субвенциониран студентски оброк и Изјава за точност на внесените податоци. МОН ќе обезбеди сите други потребни документи од релевантни институции како МВР, АВРМ, УЈП и студентските служби.
Студентите кои имаат потреба од дополнителна помош при аплицирањето можат да се обратат до Секторот за ученички и студентски стандард преку електронска пошта на subvencioniran.obrok@mon.gov.mk или лично во канцеларијата на приземјето во зградата на министерството.
Субвенционираниот износ од 140 денари дневно е наменет за купување храна и може да се користи од понеделник до сабота. Овој надоместок нема да се исплаќа во периодот на летниот распуст од 1 јули до 1 октомври. За исплатите е задолжена Шпаркасе банка АД Скопје, со која студентите ќе склучат договор за отворање на посебна сметка и наменска платежна картичка.
Дополнително, студентите кои не го оствариле правото на субвенциониран оброк или на кои им било укинато поради неисполнување на критериумите, ќе можат повторно да аплицираат во периодот од 1-ви до 5-ти секој нареден месец, доколку повторно ги исполнуваат условите.
