Ледениот дожд, стопениот па повторно замрзнат снег и екстремно ниските температури често предизвикуваат замрзнување на вратите или бравите на автомобилите. Водата што се задржува меѓу гумените заптивки и каросеријата или во самата брава лесно се претвора во мраз, што може целосно да го блокира отворањето на вратата.
Кога автомобилската врата не може да се отвори, најпрво треба да се утврди дали е замрзната гумената заптивка или самата брава. Доколку клучот влегува и се врти, но вратата не се отвора, проблемот најчесто е во залепените гумени делови. Во вакви случаи, експертите предупредуваат дека никако не треба да се применува сила, бидејќи тоа може да доведе до пукање на гумата или оштетување на вратата.
Наместо влечење, препорачливо е нежно да се притисне надворешната страна на вратата или внимателно да се потчука по лимот, со што мразот може да попушти. Добра практика е да се проверат и другите врати на автомобилот, бидејќи понекогаш совозачката врата полесно се отвора. Во краен случај, може да се користи млака вода, загреана до околу 50 степени, која внимателно се полева по рамката на вратата. Врела вода не се препорачува, бидејќи може да ја оштети бојата или да предизвика пукање на стаклото поради нагла температурна разлика.
Доколку проблемот е во замрзната брава, најбезбедно решение е користење на средство за одмрзнување. Како алтернатива може да послужи и средство за дезинфекција што содржи алкохол. Помага и загревање на клучот со запалка, по што внимателно се внесува во бравата за постепено одмрзнување. Одмрзнување со фен за коса не се препорачува, бидејќи топлиот воздух брзо се лади на ниски температури и ретко допира до замрзнатите делови, а може и да предизвика оштетувања.
За да се избегнат вакви ситуации, експертите советуваат уште пред првите мразови да се исчистат и заштитат гумените заптивки со соодветни средства за нега. Непрепорачливо е користење домашни решенија како масло, путер или козметички креми. Благ заштитен слој спречува лепење на гумите, ги штити од сушење и пукање и го намалува ризикот од замрзнување. Бравите, пак, може дополнително да се заштитат со графит или редовно подмачкување.
