Мешавината што денес ја врзуваме со есента – морско оревче, цимет, ѓумбир и каранфилче – одамна е дел од човечката исхрана.
Но, научниците откриле нешто уште повозбудливо: луѓето користеле морско оревче многу подолго отколку што се претпоставувало. Археолози на островот Пулау Ај, еден од Индонезиските Банда Острови, пронашле траги од морско оревче на керамички парчиња стари дури 3.500 години. Тоа е 2.000 години порано од претходно познатите докази за неговата употреба.
Ова откритие не е само интересен куриозитет – туку и клучно парче од мозаикот што ја објаснува историјата на глобалната трговија со зачини. Илјадници години откако жителите на Пулау Ај го мешале морското оревче во своите садови, токму тие зачини станале едни од највредните стоки во светот. Азија ги продавала на Блискиот Исток и Северна Африка, а оттаму, во мали количини, стигнувале до гладна Европа.
До 1300-тите години, трговците веќе патувале кон Банда Островите – единственото место каде што растело морското оревче. Неговата вредност била неверојатна: „едно кило морско оревче чинело колку седум угоени волови и било поскапо дури и од злато,“ запишал професорот по економија Џон Манро од Универзитетот во Торонто.
Жедта за зачини била меѓу главните причини за европското поморство и колонијализам. Толку голема била страста за морско оревче, што во доцните 1600-ти Холанѓаните ѝ го дале својот колонијален град Нов Амстердам на Британија – за возврат добиле контрола над Пулау Рун, друг остров од Банда богат со морско оревче. Нов Амстердам подоцна го доби името кое го носи и денес: Њујорк.
„Фасцинантно е да се види толку рана употреба на морско оревче – зачин кој илјадници години подоцна ја промени историјата,“ изјави Питер Лапе, професор по антропологија на Универзитетот во Вашингтон, кој го предводел археолошкото ископување.
Денес, вкусот што некогаш бил достапен само на мал тропски остров е глобален феномен. Минатата година во САД се продале производи со „зачин од тиква“ во вредност од речиси половина милијарда долари. Очигледно е дека древните жители на Индонезија одамна ја откриле магијата на овие зачини.
Извор: History
