Местото, кое остана речиси недопрено од човечка рака, ќе се претвори во рај за најбогатите. Сепак, оваа инвестиција воопшто нема да биде лесна. Островот Сазан, кој се наоѓа покрај брегот на Албанија, до неодамна беше речиси заборавена точка на картата на Европа. Денес, благодарение на инвестиција вредна повеќе од милијарда долари, има шанса да стане едно од најексклузивните одморалишта во Медитеранот. Иванка Трамп и нејзиниот сопруг планираат да го претворат овој најголем албански остров во луксузен туристички комплекс.
Реконструкција на островот Сазан
На прв поглед, Сазан изгледа како идеално место за летен одмор. Сепак, во реалноста крие многу тајни. Во текот на 70-тите години, островот беше клучна точка на албанската воена одбрана. Во него се наоѓала база на подморници, хемиско оружје и мрежа од подземни бункери и тунели дизајнирани да издржат нуклеарен напад.
Во тоа време на островот живееле околу 150 воени семејства, а инфраструктурата вклучувала театар, училиште и болница. Денес, од тој период останале напуштени бункери и знаци што предупредуваат за мини и неексплодирани убојни средства, кои сè уште претставуваат сериозна закана.
И покрај сложената историја, островот го привлече вниманието на ќерката на американскиот претседател. Благодарение на новиот проект на Иванка Трамп и Џаред Кушнер, островот има шанса за сосема нов живот. Во јули 2024 година, во разговор со Лекс Фридман, Иванка објави дека на островот ќе се гради „необично одморалиште“.
„Работам со мојот сопруг, го имаме овој остров од 1.400 хектари во Медитеранот и ги ангажираме најдобрите архитекти и најпознатите брендови“, рече тогаш Иванка, на која ѝ се придружи Кушнер: „Сакаме да создадеме место каде што самите би сакале да поминуваме време со семејството и пријателите“.
Контроверзиите околу островот
Проектот, кој би ја опфатил целата површина на островот, веќе предизвикува бројни контроверзии. Иако албанската влада даде прелиминарно одобрение за инвестицијата на крајот на 2024 година, многу прашања остануваат неодговорени. Многумина се прашуваат дали луксузниот туризам може да коегзистира со уникатниот екосистем на островот и дали местото ќе биде комерцијализирано на штета на природата.
Проектот за луксузен одморалиште на Сазан предизвикува сериозна загриженост кај екологистите. Островот се наоѓа во рамките на Националниот морски парк Карабурун-Сазан, што значи дека неговите плажи и води се формално заштитени.
Олси Ника, морски биолог и директор на организацијата Еко Албанија, во интервју за „Гардијан“ предупреди дека „изградбата на згради, движењето на јахти и испуштањето на отпадни води би можеле да имаат катастрофално влијание врз локалниот екосистем“.
