Преговарачот на американскиот претседател Доналд Трамп, Стив Виткоф, и зетот на претседателот, Џаред Кушнер, денес ќе се сретнат во Москва со рускиот претседател Владимир Путин на разговори за завршување на најкрвавата европска војна по Втората светска војна, пренесува Reuters.
Трамп од повторното доаѓање во Белата куќа постојано повторува дека сака крај на војната во Украина, но неговите досегашни напори, вклучувајќи средба со Путин на Аљаска, досега не дале резултат.
Минатата недела протече американски нацрт на мировен план од 28 точки, за кој украинските и европските официјални лица сметаат дека преголемо попушта на Москва.
Русија бара Украина да се откаже од членство во НАТО, да се задржи руската контрола над петтина од украинската територија и да се воведат ограничувања за украинската армија.
Европските држави дале свој контра-предлог за мир на разговорите во Женева, а САД и Украина објавиле дека создале „ажуриран и преработен мировен рамковен договор“ за крај на војната.
Портпаролот на Кремљ изјави за новинарите дека средбата на Виткоф со Путин ќе се одржи во втората половина на вторник. Тој одбил да зборува за „црвените линии“ на Русија, истакнувајќи дека „дипломатијата преку мегафон“ не го помага процесот.
Белата куќа објави дека Виткоф ќе биде придружуван од Кушнер во руската престолнина, пренесува Reuters.
Путин постојано повторува дека е подготвен за мировни преговори, но и дека Русија ќе продолжи со военото напредување доколку Украина го одбие договорот. Русија моментално окупира повеќе од 19% од украинската територија, што е за еден процент повеќе отколку пред две години.
Според украински извори, Русија во 2025 година напредувала најбрзо од 2022 година. Руски воени команданти во понеделник известиле до Путин дека освоиле стратешки важни градови како Покровск и Вовчанск, пренесува Reuters.
