Настапувајќи во емисијата „Хит Твит“ на провладината телевизија Пинк, Вучиќ прикажа видео-снимки за кои тврди дека се направени неколку часа пред трагедијата, при што во нив се гледа Миша Бачулов, опозициски политичар и советник во Собранието на Нови Сад.
Според Вучиќ, Бачулов „шета“ пред железничката станица на 1 ноември 2024, неколку часа пред падот на конструкцијата. Тој ги обвини поединечни структури во државата дека ја криеле снимката и сугерираше дека трагедијата можеби била „наместена“.
„Замислете да е вистина дека се случило нешто друго. Како знаевте на 2 ноември што точно се случило без вештачење?“ – праша Вучиќ.
Снимка од пред 3 часа стана „непосредно пред трагедијата“
На видеото прикажано во емисијата, јасно стои дека е снимено помеѓу 8:00 и 8:45 часот – а надстрешницата паднала во 11:52. Сепак, на Пинк беше прикажано со натпис: „Миша Бачулов непосредно пред падот“.
Гледачите коментираа дека Бачулов на снимката се движи сосема нормално, гледајќи во мобилниот телефон, без какво било „чудно“ однесување.
Она што Вучиќ го претставува како „ексклузива“, одамна било јавно
Дополнителен апсурд, велат критичарите, е што самиот Бачулов уште минатата година јавно изјавил дека утрото на трагедијата бил на колодворот:
„Пола час пред уривањето поминав под надстрешницата. Кога стигнав во Белград, слушнав што се случило. Оттогаш не сум се качил во воз – и нема ни да се качам“, рече Бачулов.
Опозиционерот: „Загрижен сум за безбедноста на моето семејство“
По настапот на Вучиќ, Бачулов се огласи:
„Ова е врв на репресија. Вучиќ сега оди на сè или ништо. Јас сум само обичен советник, а тој испрати порака до јавноста дека јас сум виновен за смртта на 16 луѓе. Затоа сум загрижен за безбедноста на моето семејство“, рече тој.
Експертите утврдија што ја предизвикало трагедијата – и тоа не е опозицијата
Истражувањата по падот покажаа дека причина за уривањето е преоптовареност и корозија на затегите што ја држеле конструкцијата – што со години било занемарено. За пропустите се сомничеа лица блиски до власта, вклучително и министри.
Сепак, Вучиќ сега ја пренасочува вината кон опозицијата, и тоа само неколку недели пред годишнината од трагедијата што предизвика масовни протести и ја разниша неговата власт.
Без граници во политичките манипулации
Ова не е првпат Вучиќ да користи шокантни изјави – најавувал атентати, предвидувал светски војни, и често тврди дека е жртва на заговори. Но, според аналитичари, ваквата злоупотреба на една трагедија за политички поени ја преминува и последната граница на моралот.
Се чини дека целта е јасна: да се дефокусира јавноста и да се компромитира опозицијата во период кога се ближи болното сеќавање на настан кој Србија нема да го заборави.
Извор: Index.hr
