Вторпат во Македонија и во светот ќе се одржи уникатната трка со педалинки која минатата година го имаше своето премиерно издание.
На премиерното издание на Red Bull Педалинка, кое лани се одржа на 24 август, доминираа супер-креативните тимски маски, како и тактичката спремност, борбеноста и тимскиот дух на сите натпреварувачи, страсната публика и опуштената атмосфера покрај езерото.
Култните педалинки, како “симбол” на едно охридско лето, се дефинитивно дел од секоја дружба и сечија летна приказна. Па, целта и идејата позади овој настан е да се спојат забавата и спортот, преку активирање на тимскиот дух и креативност, со специјален Red Bull осврт – спортски натпревар со педалинки низ Охридското езеро, и тоа во самиот епицентар на Охрид.
Тоа што ја прави оваа трка уникатна е фактот дека учесниците освен што треба да поседуваат тимски дух, спортска интелигенција и натпреварувачки карактер, исто така е потребно да ја разбудат својата креативност и иновативност, бидејќи се многу важен дел од целото искуство.
Зошто? Затоа што секој тим има можност да подготви тимска маска и со истата да се презентира низ сите фази од натпреварот, а со тоа директно влегува во игра за интересна и вредна награда.
Како можеш да го пријавиш твојот тим на Red Bull Педалинка?
Пријавите се веќе отворени, а сѐ што треба да направиш е да оформиш четиричлен тим, каде барем еден од учесниците е од спротивниот пол и сите во тимот да имаат 18+ години.
Новитетите за оваа година вклучуваат интересни промени во спортскиот формат и изгледот на Red Bull Педалинка, сѐ со цел да се даде дополнителен фокус на тимската работа, забавниот сегмент и тимската координација.
На кратко, трката ќе биде поделена во три фази, каде секоја фаза има уникатна карактеристика:
- Тимовите истовремено стартуваат и се движат кон целта
- Тимовите се движат накај пловката, која претставува точка за промена на местата на педалинката и
- Тимовите треба да совладаат предизвик кој ќе ја тестира нивната прецизност
Наградени ќе бидат прво, второ и трето место, но исто така ќе има награда и за најдобрата тимска маска.
Пријави го својот тим тука, а за повеќе информации следи ја официјалната страна на Red Bull Македонија.
