Во наредбата, пренесена од атинската телевизија СКАИ, Цавелас оценува дека земјоделците со блокадите вршат кривични дела, а дека претставниците на државните органи кои не го применуваат законот врз нив ќе сносат и дисциплинска и кривична одговорност.
Покрај блокадите на граничните премини и клучните патишта, земјоделците во понеделникот ги блокираа и аеродромите на Крит – во Ираклион и Хања. Дел од демонстрантите влегле на пистите и во зоните за пристигнување и заминување на патниците, што доведе до прекин на работата на аеродромите.
Имало и судири со полицијата, а протестите во аеродромските зони биле прекинати дури кога земјоделците самите одлучиле да се повлечат.
Денес демонстрантите почнаа да ги заземаат и патничките пристаништа, блокирајќи го нивното функционирање. Дел од бродовите испловуваат празни поради неможноста да се изврши редовно вчитување на патниците.
Министерот за земјоделство, Костас Цијарас, изјави дека земјоделците не присуствуваат на преговори бидејќи немаат заедничко координативно тело, туку секоја блокада настапува со сопствени, локални барања. Тој најави дека од следната година нема да има проблеми со исплатата на субвенциите за сточарите, нагласувајќи дека ќе се врши реално пребројување на стадата, по што ќе се исплаќаат средствата.
Ова доаѓа по големиот скандал во кој, според грчките истражители, биле пријавувани поголем број грла стока од реалниот или дури и непостоечки стада, како и други измами во земјоделството, што предизвика смени во владата и серија апсења.
Анкетата на агенцијата „Интервју“, објавена денес, покажува дека 76 проценти од граѓаните ги поддржуваат земјоделците, но мислењата за блокадите се поделени: 53 проценти се согласни со блокирањето на патиштата како форма на протест, додека 46 проценти се против.
Според истата анкета, најголема доверба во раководењето на државата граѓаните му даваат на премиерот Киријакос Мицотакис (30,8%), а далеку зад него е лидерот на ПАСОК, Никос Андрулакис (8,1%). На евентуални избори, за Нова демократија би гласале 25,8 проценти од анкетираните, а за ПАСОК 11,6 проценти. Остатокот од политичките партии би освоиле помалку од седум проценти.
Сириза, која ја водеше земјата во втората половина од претходната деценија, би добила само 3,3 проценти од гласовите, додека Комунистичката партија на Грција има нешто поголема поддршка 5,9 проценти.
Извор: N1info.rs
