Ново истражување спроведено во Холандија и Шпанија открива дека временските услови можат значително да влијаат на менталното здравје на младите. Истражувачите од Институтот за глобално здравје во Барселона (ISGlobal) утврдиле дека долготрајната изложеност на студ во Холандија е поврзана со појава на анксиозност, депресија, повлеченост и други ментални проблеми кај адолесцентите и младите возрасни лица. Во Шпанија, пак, високите температури биле поврзани со проблеми со вниманието.
Анализата опфатила околу 3.900 адолесценти во Холандија и речиси 900 во Шпанија во периодот од 2015 до 2022 година. Биле следени временските услови од три дена до два месеца пред младите да пријават психички симптоми.
Резултатите сугерираат дека менталното здравје на младите би можело да биде загрозено со оглед на тоа што климатските промени доведуваат до поекстремни температури. Есмее Есерс, водечки автор на студијата и докторанд на ISGlobal институтот, истакнува дека е од клучно значење да се разбере како климатските промени влијаат на менталното здравје на младите во развој.
Иако студијата не докажува дека температурата директно предизвикува ментални проблеми, откриена е јасна поврзаност. Екстремните временски услови можат да ја нарушат способноста на телото да одржува стабилна внатрешна температура, што предизвикува стрес и воспалителни процеси кои би можеле да придонесат за ментални тегоби.
Претходни истражувања веќе покажале врска помеѓу климатските промени и менталното здравје. На пример, во Швајцарија, во текот на 45-годишен период, бројот на хоспитализации поради ментални нарушувања се зголемил за 4% на секои 10°C зголемување на просечната дневна температура.
Овие наоди укажуваат на потребата од понатамошни истражувања и развој на стратегии за заштита на менталното здравје на младите во услови на климатски промени.
