Обилни снежни врнежи, силни ветрови и поплави предизвикаа сериозни проблеми во повеќе европски земји. Без струја останаа десетици илјади домаќинства во Словенија, делови од Хрватска се соочуваат со поплави од надојденото море, во Австрија лавина затрупа автобус, а во Франција се евакуираат цели населени места.
Словенија: илјадници без електрична енергија
Поради обилните снежни врнежи, околу 30.000 потрошувачи во регионот на Марибор и повеќе од 6.000 во подрачјето на Целје останаа без електрична енергија. Во Марибор има и проблеми со водоснабдувањето.
Сообраќајот во делови од земјата е значително отежнат поради снежни наноси, а најмногу снег има во Корошка и Подравје. Според прогнозите, врнежите треба да продолжат до доцна попладне.
Хрватска: морето навлезе во куќи
Далматинскиот брег повторно беше погоден од поплави поради циклонска плима и силен јужен ветер. Морето навлезе во куќи во шибеничката населба Долац, а критична ситуација имаше и во Каштела, Сплит, Трогир и на Чиово.
Комбинацијата од низок воздушен притисок и силни ветрови доведе до нагло зголемување на нивото на морето. Дополнителен проблем создаде и обилниот дожд, кој го оптовари системот за одводнување.
Во Трибунј беше поплавен пат, додека жителите на Дони Каштела поставуваа вреќи со песок за заштита на објектите. Повеќе бродски и траектни линии беа привремено прекинати.
Во северозападниот дел од Хрватска, вклучувајќи ги Сљеме, Завижан, Горски Котар и Лика, падна снег, а на повеќе сообраќајници се воведени зимски услови.
Австрија: затворен аеродром, лавина затрупа автобус
Меѓународниот аеродром во Виена привремено го прекина сообраќајот поради снежното невреме. Од 117 планирани летови до 9 часот, 19 биле откажани.
Во источна и јужна Австрија стотици камиони останаа заглавени на автопатиштата. Во Тирол лавина затрупа автобус со 11 патници, но според информациите, нема повредени.
Полицијата привремено ја затвори обиколницата околу Виена во двата правци, а чистењето на патиштата е во тек. Во јужна Австрија повеќе од 4.000 домаќинства останаа без струја поради паднати гранки врз далекуводите.
Франција: евакуации поради поплави
Три департмани – Лоара Атлантик, Мен и Лоара и Приморска Шаранта – се под црвено предупредување поради поплави. Уште 14 департмани се под портокалова тревога.
Во Мен и Лоара е евакуиран цел град поради порастот на реката Сарт, чиј водостој достигнал 6,63 метри. Централните делови на Анже и Сант се делумно под вода, а штети се пријавени и на земјоделски површини во регионот Лот и Гарона.
Иако за денес е најавено суво време, метеоролозите предупредуваат дека поплавниот бран продолжува да се движи низводно. Во алпските региони останува ризик од лизгање на земјиштето, додека налетите на ветер достигнале и до 147 километри на час.
Метеоролошките служби во повеќе земји издадоа предупредувања за внимателност, додека службите за итни случаи продолжуваат со интервенции на терен. Стабилизацијата на состојбата се очекува со намалување на врнежите и слабеење на ветерот во наредните денови.
