Пакистанските сили утрово извршија воздушни напади врз Кабул и уште две провинции во Авганистан, само неколку часа по прекуграничниот напад на авганистанските трупи врз пакистанските гранични сили. Според светските медиуми, станува збор за најнова ескалација меѓу двете земји и покрај договорот за прекин на огнот постигнат минатата година со посредство на Катар.
Како што објави The Guardian, по неколкумесечни судири од типот „око за око“, авганистанските сили вчера извршиле напад врз пакистанските позиции долж границата. Талибанската влада во Кабул го оцени потегот како одмазда за претходни смртоносни удари од страна на Исламабад. Набргу потоа, во Кабул одекнале најмалку три експлозии, но засега нема официјални информации за точните локации и евентуални цивилни жртви.
Премиерот на Пакистан, изјави дека вооружените сили на неговата земја се подготвени да одговорат на секоја агресија, додека министерот за одбрана, оцени дека станува збор за „отворена војна“. Тој порача дека Пакистан очекувал мир по повлекувањето на НАТО од Авганистан, но наместо тоа, според него, следела ескалација на насилството.
Од друга страна, авганистанските власти соопштија дека во претходните судири загинале десетици пакистански војници, додека Исламабад изнесе значително пониски бројки и тврди дека има само неколку загинати припадници на своите сили. Разликите во податоците дополнително ја засилуваат неизвесноста околу вистинскиот биланс на жртвите.
Генералниот секретар на Обединетите нации, Антонио Гутереш, преку својот портпарол повика на воздржаност и заштита на цивилите во согласност со меѓународното право, нагласувајќи ја потребата од дипломатско решение.
Односите меѓу Пакистан и Авганистан се влошуваат со месеци, а граничните премини долж линијата „Дуранд“, долга 2.611 километри, во голема мера остануваат затворени по претходните смртоносни судири. И покрај посредничките обиди на Катар и Турција, траен договор меѓу двете страни сè уште не е постигнат, додека новите воздушни удари отвораат прашање дали регионот се соочува со поширок конфликт.
