Европската комисија соопшти дека, согласно најавата од јуни, се воведуваат привремени повисоки царини за увоз на електрични возила од Кина, кои ќе се движат од 17,4 до 37,6 отсто.
Според најавата, за автомобилите BYD во иднина ќе се плаќа царина од 17,4 отсто, Geely 19,9 отсто, а SAIC 37,6 отсто.
Останатите кинески производители на автомобили ќе плаќаат царина од 20,8 отсто, додека компаниите кои не соработувале во истрагата на Европската унија за субвенции очекуваат царина од 37,6 отсто.
Споредено со однапред објавените стапки на 12 јуни 2024 година, привремените давачки се благо прилагодени врз основа на коментарите за точноста на пресметките поднесени од заинтересираните страни.
Царините ќе се применуваат најмногу четири месеци, а во тој период мора да се донесе конечна одлука за дефинитивните царини, преку гласање на земјите членки на Европската унија.
Заинтересираните страни имаат можност и во рок од пет дена од стапувањето во сила на времените мерки да побараат расправи со службите на Комисијата и да дадат коментар во рок од 15 дена од стапувањето во сила, а Комисијата ќе го објави својот предлог за дефинитивни мерки.
„Комисијата потоа ќе им го претстави конечното решение на земјите-членки, кои ќе гласаат според процедурата за испитување според правилата на комитологијата (предлогот на Комисијата е усвоен доколку нема квалификувано мнозинство против него). Ова гласање ќе има правно обврзувачки ефект. Сите потенцијални мерки ќе бидат во сила пет години, со можност за продолжување врз основа на образложено барање и последователно разгледување“, соопштија од Комисијата.
Заедно со овие планови, во тек се преговорите со властите во Пекинг за да се дојде до решение кое е компатибилно со правилата на Светската трговска организација.
Воведувањето тарифи има за цел да го локализира производството на електрични возила и батерии во Европската унија со цел да ја направи Европа поконкурентна со Кина.
Сепак, Кина одлучи да воведе контрамерки за Европа и најави зголемување на тарифите за автомобилите на бензин од Европската унија. Се размислува за воведување царина од 25 отсто за увозните европски автомобили со бензински мотори од 2,5 литри или повеќе.
Фото: pexels
