Оваа зима Скопје повторно ќе трепери во ритамот на тешките рифови и бруталната енергија на Востание #9 – најсилниот домашен хардкор собир што ќе се одржи на 19 декември во Станица 26.
Главни хедлајнери на настанот се INTEGRITY, еден од највлијателните и најлегендарни бендови во историјата на хардкор музиката. Формирани во Кливленд во 1988 година, тие го поставија темелот на metallic hardcore звукот, комбинирајќи мрак, агресија и филозофска визија за светот во распаѓање. Нивната музика — мешавина од панк, метал и апокалиптични теми — создаде култен статус кој трае повеќе од три децении.
„Integrity“ се познати по своите ретки, но енергични настапи, кои ја спојуваат суровата енергија на подземната сцена со митската атмосфера на хардкор културата.
Како дел од програмата настапуваат и Stone Cold — кросовер хардкор бенд од Италија, составен од членови на Fulci, Slander и Silver. Нивното ново ЕП, издадено преку Born Dead Collective, донесува свеж, но бескомпромисен звук кој совршено ќе ја надополни вечерта.
Домашната сцена ќе ја претставуваат Shock Troopers и Primitive Dread — две имиња што одамна го цементираа својот статус на локални хардкор херои, познати по моќните живи настапи и автентичната енергија на македонскиот андерграунд.
Билетите се веќе достапни во претпродажба, во ограничен број, преку drugastrana.mk
