Глобалните берзи доживеаја значителен пад, додека кризата на Блискиот исток предизвика нагло зголемување на цените на нафтата, што може да доведе до пораст на инфлацијата и штета врз економиите ширум светот.
На Волстрит, индексот Dow Jones минатата недела се намали за 2% на 46.558 поени, додека S&P 500 падна за 1,6% на 6.632 поени, а Nasdaq за 1,3% на 22.105 поени.
Инвеститорите се воздржуваат од ризични вложувања, бидејќи цените на нафтата скокнаа за повеќе од 35% во последните две недели, откако САД и Израел започнаа напади врз Иран, пренесува CNBC.
Иако Доналд Трамп, претседател на САД, деновиве тврдеше дека САД и Израел победиле во конфликтот со Иран, кризата на Блискиот исток продолжува. Иран продолжува да испукува ракети кон Израел и соседните земји и блокира танкери низ Ормускиот теснец, што ја потресе нафтената индустрија, подигајќи ја цената на барелот над 100 долари на лондонското пазариште.
Меѓународната агенција за енергија (IEA) соопшти дека 32 земји-членки ќе ослободат рекордни 400 милиони барели нафта од своите резерви за да ја намалат цената, нагласувајќи дека ова е најголемиот нарушувач на снабдувањето со нафта во историјата.
„Пазарот сфати дека кризата на Блискиот исток нема да заврши толку брзо како што инвеститорите се надеваа. Затоа преовладуваше мотото: прво продадете акции, па поставувајте прашања“, објаснува Рајан Детрик, стратег во Carson Group.
Инвеститорите најмногу се загрижени дека наглиот пораст на цените на нафтата ќе предизвика инфлација, што би ги натерало централните банки да ги зголемат каматните стапки, што негативно би влијаело врз економскиот раст.
И европските берзи забележаа пад минатата недела:
- FTSE (Лондон): -0,2% на 10.261 поен
- DAX (Франкфурт): -0,6% на 23.447 поени
- CAC (Париз): -1% на 7.911 поени
