Воен транспортен авион на колумбиското воздухопловство се урна на југот од земјата, а според првичните информации, во него се наоѓале повеќе од 100 војници.
Транспортниот авион од типот „Херкулес“, наменет за превоз на војници, се срушил во близина на градот Пуерто Легуизамо, во покраината Путумајо, недалеку од границата со Перу.
Засега нема официјални податоци за бројот на патници и евентуалните жртви, но локалните медиуми објавуваат дека во авионот имало десетици, па дури и над 100 војници. Според медиумот BluRadio, бројката достигнува до 110 припадници на безбедносните сили.
Колумбискиот министер за одбрана, Педро Санчез, ја потврди несреќата, наведувајќи дека станува збор за „трагичен инцидент при полетување“. Тој не прецизираше дали има загинати, но нагласи дека настанот е „длабоко тажен за земјата“.
Спасувачки екипи веднаш биле испратени на местото на несреќата, кое се наоѓа на околу три километри од градот.
Производителот на авионот, американската компанија Lockheed Martin, засега не се огласи со коментар.
Ова не е изолиран случај во регионот. На крајот на февруари, во Боливија се урна сличен авион од типот C-130 „Херкулес“, при што загинаа повеќе од 20 лица, а десетици беа повредени.
Истрагата за причините за несреќата во Колумбија е во тек.
