Неидентификуван дрон се урнал во северозападниот дел на Турција, во провинцијата Баликесир, што е трет ваков инцидент во последните седум дена, јавуваат турските медиуми.
Според весникот Хуријет, локалните жители најпрво слушнале звучен сигнал од блиско поле, а потоа пронашле дрон со отворен падобран. Инцидентот се случил во петок, по што граѓаните веднаш ги известиле надлежните служби.
На местото биле испратени тимови за отстранување експлозивни направи, истражители и специјално обучени кучиња. Стручните екипи провериле дали леталото носи експлозив, а откако било утврдено дека нема никакви ознаки, знамиња или амблеми, дронот бил испратен во Анкара на детална техничка анализа.
Најновиот инцидент следува по падот на дрон во провинцијата Коџаели на 19 декември, кој турските власти го идентификуваа како руски Орлан-10, беспилотно летало што се користи за извидување и надзор. Истрагата за тој случај сè уште е во тек, а медиумите јавија дека леталото било оштетено при падот.
Претходно, во понеделникот, турските сили собориле дрон кој се приближувал до воздушниот простор над Црното Море.
Инцидентите се случуваат во период на зголемени тензии во регионот. Турскиот претседател Реџеп Таип Ердоган неодамна предупреди дека Црното Море станува зона на конфронтација меѓу Русија и Украина, откако нападите почнаа да го загрозуваат поморскиот сообраќај. Минатата недела, во украинското пристаниште Одеса беше оштетен и еден турски брод.
