Во Музејот на Македонија во Старата скопска чаршија во сабота ќе се одржи Фестивал на стари игри. На отворениот простор околу музејот ќе бидат презентирани повеќе традиционални друштвени игри: ластик, плочка, скокање јаже, народна, хулахоп, летање змеј и многу други. Ќе учествуваат ученици од повеќе основни училишта од Делчево, Кавадарци, Охрид, Скопје и од Тетово.
„Целта на овој фестивал е интерактивно учество на децата и младите преку спортски, друштвени и борд игри, запознавајќи се меѓусебно и претставувајќи ги традициите од реоните од кои доаѓаат. Идејата е повеќе од типот да се извлечат надвор децата, да се дружат деца од различни градови и да им ги претставиме игрите на нивните родители кои се своевидно културно наследство. Настанот е предвиден да се одржи на отворено, на плочникот меѓу Музејот на Македонија и дворот на Куршумли ан за да привлече внимание на јавноста и што поголема посетеност“,– изјави Соња Шуплевска од Асоцијацијата „Детски свет“, организатори на фестивалот.
Дел од игрите ќе бидат со презентациски карактер, а дел ќе бидат и со натпреварувачки дух. За наградите се погрижи Издавачки центар ТРИ со тоа што на победниците ќе им се поделат пакетчиња со книги.
Етнологот, Душица Брасиќ истражуваше и направи брошура за овие игри кои ќе бидат дел од настанот, а за дел од нив дојде до сознание дека потекнуваат од пред нашата ера како џамлии, хулахоп и слично.
Влезот ќе биде слободен, а на посетителите ќе им биде овозможен и бесплатен влез во музејот. Настанот ќе биде проследен со неколку музички настани со различен жанр на музика презентирајќи не само традиционални песни и ора туку и нивни современи обработки на актуелни македонски композитори.
Овој фестивал е поддржан од министерството за култура како проект од национален интерес.
