Гордана во Фејсбук групата „Грчка инфо“ сподели важно предупредување за сите што престојуваат во Неи Порија.
Имено, како што беше завчера најавено на состанок на претставници на локалната заедница, пред три дена на овој простор е забележана риба-пајак.
Поради неговата токсичност, на граѓаните им се препорачува да бидат внимателни и да носат „водени балетанки“ или соодветни обувки кои ги штитат стапалата при пливање или одење во плитко.
Рибата пајак (Scorpaena porcus), позната и како риба скорпија, е вид на отровна риба која често се крие на песочно или карпесто дно.
Нејзиниот изглед наликува на камен или корал, што го отежнува забележувањето. Нејзините боцки содржат отров кој може да предизвика силна болка, оток и воспаление, а во ретки случаи и посериозни здравствени проблеми доколку не се обезбеди навремена помош.
Овие риби не се агресивни и не напаѓаат, но може случајно да се згазат ако невнимателно одите по плитките или карпите каде што живеат. Затоа, носењето заштитни обувки како што се балетанки е најдобриот начин да се избегне непријатност.
Ако згазнете риба-пајак, веднаш излезете од водата и побарајте лекарска помош.
Стапалото обично се третира со миење на раната, натопување во топла вода (што може да ја ублажи болката) и давање соодветна терапија. Важно е да не ги игнорирате симптомите, особено ако имате отежнато дишење, силен оток или вртоглавица.
