Изложба на дела од ликовниот уметник Синиша Кашавелски, беше отворена вечерва во Музеј галерија Кавадарци. Директорот на музејот, Јаким Зимоски рече дека Кавадарци има чест и задоволство да ги види делата на Кашавелски.
За творештвото на уметникот, говореше Трајче Цветков, виш кустос, историчар на уметноста при оваа културна установа.
-Имаме привилегија да присуствуваме на една извонредна ретроспективна изложба на нашиот еминентен ликовен уметник Синиша Кашавелски кој достојно ја презентира нашата земја во светот. Неговата способност да го прикаже не само она што се гледа, туку и емоциите и мислите зад тие слики, внесува дополнителен слој на длабочина во неговата работа. Мајсторството на Кашавелски лежи во неговата способност да создаде наратив во статична рамка на слика, подвлече Цветков.
Голем број љубители на уметноста беа дел од вечерашниот настан збогатен со музика, а присутните имаа можност, покрај другото, да дегустираат и вина од винаријата „Лазар”.
