Експертите се согласуваат за штетноста на алкохолот за здравјето, но земјите од Европската Унија не се согласуваат за тоа која количина алкохол може да се смета за нискоризична.
Светската здравствена организација (СЗО) наведува дека ниедно ниво на алкохол не е безбедно за консумирање, ставајќи го алкохолот во првата група канцерогени, групата со највисок ризик, заедно со азбестот, зрачењето и тутунот.
Според податоците на СЗО, Европската Унија е подрегионот со најголема потрошувачка на алкохол во светот, а исто така е и регион каде што ракот е водечка причина за смрт.
Годишната потрошувачка на алкохол по жител во земјите од Организацијата за економска соработка и развој (ОЕЦД) во 2023 година изнесувала просек од 8,5 литри чист алкохол.
Во Латвија, Португалија и Романија, годишно се консумирале повеќе од 11,5 литри, а речиси една третина од земјите регистрирале потрошувачка од 10 литри или повеќе по жител.
„Европскиот регион не може да си дозволи илузија дека консумирањето алкохол е безопасно“, изјави директорот на Одделот на СЗО за превенција и промоција на здравјето, Гундо Вајлер, пренесува Euronews.
Иако експертите се согласуваат дека алкохолот е штетен за здравјето, некои студии покажуваат дека умерената потрошувачка не претставува ризик од срцеви заболувања или мозочен удар.
Неодамнешна студија на Американската асоцијација за срце (AHA) дури наведува дека малите количини алкохол можат да го намалат ризикот од коронарна артериска болест.
Сепак, AHA истакнува дека „ако не пиете алкохол, не почнувајте, а ако пиете, ограничете го внесот“.
Иако некои истражувања сугерираат дека умерената консумација нема ефект или дури и го намалува ризикот од срцеви заболувања и мозочен удар, AHA вели дека сите докази заедно не ги поддржуваат придобивките за општата популација.
„Всушност, кај некои луѓе, дури и едно до две пијалоци дневно може да го зголемат крвниот притисок“, изјави AHA.
Во врска со количината на алкохол што може да се смета, ако воопшто постои, за „низок ризик“ за здравјето, постојат различни ограничувања во европските земји.
Според упатствата на ирската NHS, жените треба да пијат не повеќе од 11 стандардни пијалоци неделно, а мажите не повеќе од 17, со најмалку два или три дена без алкохол и не повеќе од шест пијалоци дневно.
Стандарден пијалок содржи 10 грама чист алкохол, што може да биде чаша вино од 100 мл или половина чаша пиво.
Естонија и Полска ја ограничија „безбедната“ консумација на алкохол на 40 грама дневно (четири мали пива) за мажи и 20 грама за жени.
Министерството за здравство на Шпанија препорачува максимум 10 грама алкохол дневно за жени и 20 грама за мажи.
Латвија и Литванија советуваат воопшто да не се пие алкохол.
