Министерството за здравство и социјална заштита на Соединетите Американски Држави (HHS) во петокот прогласи вонредна состојба во јавното здравство за Калифорнија за да се справи со здравствените последици од шумските пожари кои се во тек во округот Лос Анџелес.
Шумските пожари ги опустошиле четвртите на Лос Анџелес на источната и западната страна, убивајќи досега десет лица и уништувајќи речиси 10.000 градежни објекти, а се очекува дека овие броеви ќе растат.
Прогласувањето на вонредната состојба во јавното здравство им овозможува на давателите и снабдувачите на здравствени услуги поголема флексибилност во задоволувањето на итните здравствени потреби на луѓето вклучени во плановите за осигурување на Центарот за услуги Medicare и Medicaid, соопштило Министерството за здравство и социјална заштита.
HHS соопштило дека Управата за стратешка подготвеност и одговор (ASPR) е подготвена да распредели персонал за итни интервенции, заедно со медицинска опрема и залихи, доколку државата тоа побара.
Претседателот Џозеф Бајден во средата ги прогласи пожарите за голема катастрофа и изјави дека американската влада ќе ги покрие сите трошоци за опоравување во следните шест месеци, а во петокот го повтори своето ветување дека ќе обезбеди ресурси за Калифорнија за да се бори против пожаритe.
