Песни полни надеж, победоносно крунисани со стихот „што и да следува, ја бирам страната на новите деца“, на поетесата Калиа Димитрова, ќе бидат чуени на поетската промоција за збирката „Во хаосот радост“, која ќе се одржи во петок, во локалот „Бруталиск“.
Со почеток во 20 часот, втората поетска збирка на Димитрова ќе биде претставена преку разговор со писателката и професорка, Румена Бужаровска. Уредничка на книгата „Во хаосот радост“ е Душица Лазова, а дизајнот е на Кристина Атанасова.
Според професорката Елизабета Шелева, збирката ги истражува прашањата на генерацијата заглавена во просторот помеѓу растењето и стареењето, разместеноста, меланхолијата, амбивалентноста на бунтовната женскост, лудилото, но и тврдоглавата потрага по убавина, задоволство, страст за живот, континуитет, влечејќи смисла и сила токму од непомирливоста со зададените (наследените) правила.
„Поезијата на Калиа Димитрова е препознатлива по неколку специфични црти: коктел од болка, духовитост, луцидност, автентична интонација на бунтовност, урбаност, безмилосно остроумна перцепција и склоност кон јазични игри. Таа продолжува со развој на својата феминистичка освестеност за телото, неговите замки и потајни барања, за пркосот и борбата со крајпатните искушенија и пориви, вешто зачинети со, кај нас, мошне ретката, смисла за хумор и подбив со секојдневните политички флоскули“, вели професорката.
Според Бужаровска, втората поетска збирка на авторката Калиа Димитрова, „Во хаосот радост“ е зрело поетско достигнување што ѝ нуди свеж, нов идентитет на македонската поетска традиција.
„Ова е збирка која живее во урбаните пејзажи на современоста, каде што поетскиот субјект јас, од идентитетско гледиште на жена, кротко, истрајно и храбро ги соголува своите искуства, сеќавања и доживувања. Во нив несомнено доминира извесна меланхолија, извесна тага. Но и покрај тоа, овие песни се полни надеж, како што впрочем и навестува самиот наслов на збирката, од истоимената песна ‘Во хаосот радост’, која победоносно ја крунисува стихот ‘што и да следува, ја бирам страната на новите деца’“, посочува Бужаровска.
Фото: Жарко Чулиќ
Дебитантска книга на Димитрова, „Вештерките денес“ излезе од печат во 2018, во издание на издавачката куќа Темплум.
Калиа Димитрова (1991, Скопје) пишува поезија, есеи и колумни. Авторка е на збирката „Вештерките денес“ („Темплум“, 2018). Основачка е и уредничка на дигиталната феминистичка платформа Медуза, како и на печатените изданија на Медуза. Членка е на поетската платформа „Версополис“. За развој на збирката „Во хаосот радост“ престојува на писателска резиденција во Белград, доделена од европската мрежа „Традуки“. Живее, работи и се движи на ул. Орце Николов
