Изложбата, посветена на професорот Владимир Георгиевски, оваа година ја истражува темата на портретот како ликовен предизвик и како начин за откривање на човечката индивидуалност низ различни стилови и генерации.
„Трагајќи по совршениот простор и пристап кон ликовното дело, изложбата го истражува односот меѓу просторот во кој уметникот создава и просторот во кој делото живее пред публиката,“ се наведува во најавата на организаторите.
Уметничка синтеза на стилови и генерации
Проектот „Лица“ создава синтеза меѓу различни ликовни изрази, обединувајќи уметници од повеќе генерации кои активно работат во своите ателјеа и го одразуваат современиот пулс на македонската визуелна сцена.
Во рамки на отворањето ќе биде доделена годишната награда „Владимир Георгиевски“, за која жирираат Андреј Митевски (скулптор), Јасмина Котевска (историчарка на уметноста) и Фросина Георгиевска како претставник на семејството Георгиевски.
Изложбата се реализира во организација на Здружението за култура „Транзен“, во соработка со Галеријата Метаноја и семејството Георгиевски, а е дел од годишната програма на Министерството за култура.
Со „Лица“, публиката ќе има можност да ја почувствува емоционалната и естетска длабочина на портретот, како ликовна форма што постојано се менува, но никогаш не ја губи својата сила да го прикаже човекот – во својот лик, својот дух и своето време.
Извор: 24.mk
