Шумските пожари низ Европската Унија уништија повеќе од 511.000 хектари земја од почетокот на годината до средината на август, според податоците од Европскиот информативен систем за шумски пожари (EFFIS).
Како што е наведено, обемот на пожарите оваа година е повеќе од двојно поголем во споредба со просекот за истиот период во периодот 2006-2024 година.
Во исто време, бројот на регистрирани пожари надмина 1.600, што е повеќе од двојно поголем од дваесетгодишниот просек од 717.
Европската комисија објави дека бројот на барања за европска помош за гаснење пожари веќе го достигна минатогодишното ниво, кон средината на август.
„Механизмот за цивилна заштита на ЕУ беше активиран 16 пати во текот на оваа сезона, а ние сме само на половина од август“, изјави портпаролката на Комисијата, Ева Хрнчирова.
Последната земја што побара помош беше Шпанија, што беше и нејзино прво барање од постоењето на Механизмот.
Механизмот за цивилна заштита на ЕУ беше воспоставен во 2001 година за зајакнување на соработката во спречувањето и реагирањето при катастрофи меѓу земјите-членки и десетте земји-партнери, вклучувајќи ги и земјите од Западен Балкан.
Кога некоја земја бара итна помош, Европската комисија го координира одговорот и покрива дел од трошоците за транспорт и оперативни интервенции. Од своето основање, Механизмот одговори на повеќе од 770 барања за помош во и надвор од ЕУ.
