Поради безбедносни причини организаторите најавија дека овогодинешната Парада на гордоста ќе се одржува низ центарот на Белград но по различна рута од минатогодишната. Во минатото учесниците во Парадата на гордоста маршираа низ центарот на српската престолнина по улици кои сега ќе ги доведат покрај таканаречениот шаторски камп „Кациланд“, каде што поддржувачите на власта кампуваат со месеци.
Претставничката на Младинската иницијатива за човекови права (YIHR), Софија Тодоровиќ, на новинарите им изјави дека организаторите и полицијата одлучиле да ја променат рутата поради, како што рече„нелегални кампови“ пред државните институции. „Кациланд“ се наоѓа во паркот помеѓу зградата на српското претседателство и парламентот.
Парадата на гордоста ќе започне од паркот Мањеж во центарот на Белград во 14:00 часот во сабота и ќе се движи по кружна рута покрај Правниот факултет на Белградскиот универзитет (каде што парадата ќе застане за спомен-обележјето од 16 минути молчење за жртвите од трагедијата на железничката станица во Нови Сад), седиштето на српската влада и назад.
Организаторите рекоа дека овогодинешната парада на гордоста е протест.
