Стотици примероци од смртоносниот вирус исчезнаа од лабораторија во Австралија, што ја натера австралиската влада да започне истрага за, како што вели, „најголемото историско прекршување на протоколите за биобезбедност“
Властите во Квинсленд соопштија дека 323 ампули со примероци од вирусот, вклучително и вирусот хендра, вирусот Лиза и вирусот Ханта, биле пријавени за исчезнати. Примероците исчезнаа од Виролошката лабораторија во Квинсленд во август 2023 година.
Хендра е зоонозен вирус (се пренесува од животни на луѓе) кој се наоѓа само во Австралија. Вирусот Ханта е фамилија на вируси кои можат да доведат до сериозни болести и смрт, додека вирусот Лиза е група на вируси кои можат да предизвикаат беснило, пренесува Fox News.
Лабораторијата од која исчезнаа примероците обезбедува „дијагностички услуги, следење и истражување на вируси и патогени на комарци и крлежи од медицинско значење“, се вели во соопштението на Владата. Не е познато дали примероците се украдени или уништени и во моментов „нема докази за ризик за заедницата“.
Министерот за здравство на Квинсленд, Тим Николс, рече дека нема причина да се верува дека примероците се украдени намерно или за злобни цели.
„Се разбира, ваквото истражување се спроведува во тајност, но не сме свесни дека ова било користено како оружје на кој било начин. Процесот на ставање вирус во оружје е многу софистициран и тоа не е нешто што го прави аматер. “, рече Николс.
Тој посочи дека, на пример, вирусот Хендра никогаш не бил користен како биолошко оружје, додавајќи дека станува збор за вирус, првпат откриен кај коњите во 1990-тите, кој заразил само мал број луѓе, но многу од нив фатално.
Главниот здравствен службеник во Квинсленд, Џон Џерард, рече дека е „тешко да се замисли сценарио“ каде што јавноста може да биде изложена на ризик, укажувајќи на недостаток на извештаи за инфекции во изминатите пет години.
„Важно е да се забележи дека примероците од вирусот многу брзо ќе се разградат надвор од замрзнувачот на ниска температура и ќе станат неинфективни“, рече Џерард, шпекулирајќи дека примероците можеби се уништени во автоклавот, според безбедносните протоколи.
Сем Скарпино од Универзитетот Североистерн во Бостон, од друга страна, истакна дека ситуацијата во Австралија претставува „критичен неуспех во биосигурноста“.
„Патогените кои се пријавени како исчезнати може да имаат сериозни последици и можат да претставуваат закана за јавноста“, изјави Скарпино за Фокс.
Тој изјави дека трите патогени може да имаат „многу висока стапка на смртност“ кај луѓето, додавајќи дека сепак не се пренесуваат лесно од човек на човек.
„Некои хантавируси имаат стапка на смртност до 15 проценти, што значи дека тие се повеќе од 100 пати посмртоносни од корона вирусот, додека други се послични на корона вирусот во однос на сериозноста“, рече Скарпино.
Тој додаде дека постои висок ризик за животните и добитокот од сите три патогени.
