Жителите на Авганистан известуваат дека од вчера се соочуваат со ограничен пристап до неколку популарни социјални мрежи, вклучувајќи ги Instagram, Facebook и Snapchat, додека пристапот е возможен само преку VPN (виртуелна приватна мрежа), објави локалната телевизија Ariana News.
Корисници од Кабул и Мазар-и-Шариф изјавиле дека не можат да ги користат овие платформи без заобиколување на гео-ограничувањата, иако дел од граѓаните тврдат дека сè уште имаат неограничен пристап. Ограничувањата негативно влијаеле и на мали бизниси кои ги користеле мрежите за онлајн продажба и промоција на производи.
Независната организација NetBlocks, која го следи статусот на интернет-сервиси низ светот, потврди дека Instagram, Facebook и Snapchat се блокирани кај повеќе интернет провајдери во земјата, додека платформите како WhatsApp и X (поранешен Twitter) засега функционираат без прекини.
Ова не е првпат Авганистан да се соочи со дигитална изолација. На крајот на септември интернетот и телекомуникациските услуги беа целосно прекинати речиси 48 часа, што сериозно ги наруши банкарските трансакции и авионскиот сообраќај.
Иако талибанската власт не излезе со официјално соопштение, извештаи упатуваат дека одлуката за ограничување на пристапот до социјалните мрежи дошла по налог на врховниот лидер на талибанците, Хајбатуллах Ахундзада, поради наводна загриженост за „моралот на општеството“.
Талибанците веќе имаат историја на дигитална цензура. Во 2022 година тие го забранија TikTok, како и популарната онлајн игра PUBG, објаснувајќи дека ваквите содржини не се во согласност со нивната визија за исламскиот морал.
Извор: Index.hr
